ಸಾಣೆಗಾರ

ಇರಬಹುದೇ ಸಾಣೆಗಾರನ ಒಂಟಿಚಕ್ರದ ಅಂಗಡಿಯೊಳಗೆ
ಮನುಷ್ಯ ಪ್ರೀತಿಯ ನರತಂತುಗಳನ್ನು ಚೂಪು ಮಾಡುವ ಚಕ್ರ..
ಚೊಯ್ಯನೆ ಬೆಂಕಿ ಕಕ್ಕುವ ಚಕ್ರಶಿಲೆಯ ನಡುನೆತ್ತಿಯ ಮೇಲೆ
ನಮ್ಮ ಎದೆಗೂಡುಗಳನ್ನಿಟ್ಟು ಚೂರು ಮಸೆದುಕೊಳ್ಳೋಣ..
ಒಳಗೆಳೆದುಕೊಂಡ ನಮ್ಮದಲ್ಲದ ಶತ್ರುತ್ವ
ಒಂದಿಷ್ಟು ಶುದ್ದಿಯಾಗಲಿ,
ಪಾಚಿಕಟ್ಟಿದ ಗೂಡೊಳಗಿನ ಗೋಡೆಗಳಿಗೆ
ಬೆಂಕಿ ಹತ್ತಿದ ಮೇಲಾದರೂ ಉದುರಬಹುದು ಕರೆ,
ಅಂತೆಯೇ ಏನೋ ಬರೆದಿಟ್ಟ ಹಣೆಗಳನ್ನೂ ತುಸು ಚಕ್ರಶಿಲೆಯ
ಕೆನ್ನೆಗಿಟ್ಟು ಅಳಿಸಿಕೊಳ್ಳೋಣ ಇಲ್ಲದಿರುವ ಬರಹವನ್ನು..
ಅವರಿವರು ತುಂಬಿಸಿದ್ದಾರೆ ನಮ್ಮ ನರಗಳೊಳಗೆ ಕಪ್ಪು ಪಾಷಾಣ
ಎಲ್ಲ ನರಗಳನ್ನೂ ಒಂದೊಂದಾಗಿ ಬಿಡಿಸಿ ಇಡೋಣ
ಮಾಯಕಾರ ಸಾಣೆಗಾರ ತುಳಿಯುವ ಒಂಟಿಚಕ್ರದ
ಪೆಡಲ್ಲುಗಳ ಮೇಲೆ..
ಇನ್ನಾದರೂ ಶುದ್ಧಿಯಾಗಲಿ ನಮ್ಮೊಳಗು,
ಚೂಪುಗೊಂಡ ಎದೆಗೂಡು, ಹಣೆ, ನರವ್ಯೂಹಗಳ ತುಂಬ
ನುಗ್ಗಿಹರಿಯಲಿ ಪ್ರೀತಿಯ ಒರತೆ,
ಎಲ್ಲರ ಜೀವಗಳನ್ನೂ ಮುಟ್ಟುವ ಕಣ್ಣೊಂದನ್ನು ಇಟ್ಟುಕೊಂಡು
ಚೆಲ್ಲಿಬಿಡೋಣ ಉಳಿದೆಲ್ಲವನ್ನೂ
ಸಾಣೆಗಾರನ ಕಾಲ ಹೆಬ್ಬೆರಳ ದಿಬ್ಬದ ಮೇಲೆ

-ದಯಾನಂದ್ ಟಿ ಕೆ