ನಾಭಿಹಳ್ಳದ ಮೇಲೆ ಬೂದಿಯ ಕುರುಹು.........

ಕುಲಬೇರುಗಳ ಅಂಗಡಿಯಿಂದ ಕಡವಾಗಿ ತಂದ
ಎರಡೇ ಎರಡು ನೆನಪುಗಳ ಕಥೆ ಕೇಳುತ್ತಿದ್ದೇನೆ..
ಕಥೆಯೋ.. ರುಂಡಮುಂಡ, ರೆಕ್ಕೆಪುಕ್ಕ ಛೇಧಿಸಿದ ಇತಿಹಾಸದ
ಮಾಸ್ತಿಗಲ್ಲಿನ ಮೇಲೆ ಪಾಚಿಗಟ್ಟಿದ ಸತ್ತ ಹಸುರಿನ ಕಥೆ.

ಅಲ್ಲಲ್ಲಿ ಬಿಸುಟಲ್ಪಟ್ಟ ಇಟ್ಟಿಗೆ ಚೂರಿನಂತೆ ಈ ಕಥೆಗಳು
ಇಷ್ಟುದಿನ ಒಂದೇ ಮಣ್ಣಮನೆಯ ತುಂಡರಿಸಿದ ಜೀವದೊಳಗೆ
ಇನ್ನಾದರೂ ಮಿಟುಕುವ ಉಸಿರು ಬಚ್ಚಿಟ್ಟುಕೊಂಡು
ಚರ್ಮವಿಲ್ಲದ ಕಿವಿಗಳ ನಿರುಕಿಸುತ್ತ ನಾಲಿಗೆ ಮಸೆದುಕೊಳ್ಳುತ್ತಿದ್ದವಂತೆ

ಐತಿಹ್ಯದ ಚೀಲದೊಳಗೆ ತುರುಕಿಟ್ಟ ಕಾರಣಕ್ಕೋ ಏನೋ
ಒಂದೆರಡು ಕಥೆಗಳಿಗೆ ಗಂಟಲು ಕೆಟ್ಟಿದೆ,
ಗೊಗ್ಗರು ಶಬುದ ಮಾತ್ರ ಕಥೆಯಾಗದು..
ಮಾತುಗಳ ಹೂತಿಟ್ಟ ನಾಭಿಹಳ್ಳದ ಮೇಲೆ ಬೂದಿಯ ಕುರುಹು

ಪರಂಪರೆಯೊಳಗಣ ಹೆಣಗಳ ಮಾರುಕಟ್ಟೆಯಲ್ಲಿ
ಉಸಿರಾಡುವ ಕಥೆಗಳ ಬೆರಳು ಹಿಡಿದು, ಕೊರಳು ಮುಟ್ಟಿ
ನಾಡಿ ತಡವಿ, ಎದೆನಗಾರಿಗೆ ಕರ್ಣವೊಡ್ಡುವ ಗಿರಾಕಿಗಳು
ಇನ್ನಾದರೂ ಇಲ್ಲಿ ಪಾದವೂರಿಲ್ಲ..

ನನ್ನದೇ ಬೇರುಮೂಲದ ಕಡ ತಂದ ಕಥೆಗಳಿಗೆ ಬಾಯಿ ಹೊಲೆದು
ಕಣ್ಣುಗಳ ಮೇಲೆ ಆಮ್ಲದ ಹನಿಗಳನ್ನು ನಾಜೂಕಾಗಿ ಇಡಲಾಗಿದೆ
ಅವು ಮೂಕರ ಗ್ರಹದಿಂದ ಇಳಿದು ಬಂದವಂತೆ ಏನೋ ಹೇಳುತ್ತವೆ
ಕೇಳಿದ ನಾನು ನಿಲುಕಿಗೆ ಸಿಕ್ಕವಷ್ಟನ್ನು ಮಾತ್ರ ಆಯ್ದುಕೊಳ್ಳುತ್ತಿದ್ದೇನೆ.